Imodoka idasanzwe ya Škoda yanditse amateka muri “Rally y’u Rwanda” yegukanywe n’Umunyakenya

0
13

Ku nshuro ya mbere abakunzi b’umukino w’amamodoka mu Rwanda babashije kwihera ijisho aho imodoka idasanzwe yo mu bwoko bwa Škoda itumura ivumbi mu mihanda y’u Rwanda ndetse inafasha Umunyakenya, Manvier Baryan n’umwunganizi we Sturrock Drew kwegukana “Rwanda Mountain Gorilla Rally 2017”.

Iri siganwa ryabaga ku nshuro ya 16 ryari ryitabiriwe n’imodoka 16 zakinnye zose umunsi wa mbere wabaye ku wa Gatanu mu muhanda ya Rugende ndetse no kuri stade Amahoro mu gace ka “Super stage”.

Uwo munsi wegukanywe na Manvier Baryan (Kenya) & Sturrock Drew (u Bwongereza) batwaye imodoka yo mu bwoko bwa Skoda Fabia, bakurikirwa na Giancarlo Davite (u Bubiligi) & Slyvia Vindevogel (Burundi) batwaye imodoka ya Mitsubishi Evo X naho Leroy Gomez (Zambia) & Gomez Urshlla (Zambia) baba aba gatatu gusa warangiye imodoka eshanu zivuye mu irushanwa kubera ibibazo bitandukanye birimo impanuka, ibya mekanike n’ibindi.

Kuri uyu wa Gatandatu hari hatahiwe gukinira mu bice bya Bugesera, mu mihanda ya Nyamizi- Gashora (19.69kms), Gaharwa- Nemba (11.56kms), Gako-Gasenyi (14.41kms) na Gasenyi-Nemba (22.22kms) ahari abafana benshi by’umwiharimo bari baje kwihera ijisho aho Manvier Baryan na mugenzi we byongera kubashimisha bakora udushya ku modoka yabo idasanzwe.

Aba basore barimo no guhatanira kwegukana shampiyona ya Afurika ndetse bakaba bafite amahirwe menshi, banikiye abandi bakinnyi dore ko uduce twose bakinnye aribo bazaga imbere.

Nko mu muhanda wa Gasenyi-Nemba (22.22 km) ari na wo muremure bakinnye, iri tsinda ryakoresheje iminota 10:37 bakurikirwa na Bukera Valery / Khetia Nital batwara imodoka ya Subaru Impreza wakoresheje iminota 10:51 na ho Giancarlo Davite / Slyvia Vindevogel batwara imodoka ya Mitsubishi Evo X baza ari aba gatatu n’iminota 11:19.

No muri rally yose muri rusange, Baryan Manvir afatanyije na Sturrock Drew mu modoka yabo ya Skoda Fabia nibo baryegukanye bakoresheje 1h47’06″ mu minsi ibiri hamwe bakurikirwa na Giancarlo Davite afatanyije na Sylvia Vindevogel batwara Mitsubishi Evo bakoresheje 1h51’40”.

Bukera Valery na Khetia Nital batwara Subaru Impreza bari begukanye iri siganwa umwaka ushize, kuri iyi nshuro babaye aba gatatu bakoresheje 01h52’09”, Gomes Leroy na Gomes Urshlla batwara Mitsubishi Evo10 babaye aba kane bakoresheje 1h52’09”naho Nizette Christophe na Fabrice Semana batwara Subaru Impreza baba aba gatanu bakoresheje 1h55’02” bakaba ari nabo Banyarwanda baje hafi.

Giancarlo Davite waherukaga kwitabira Rally y’u Rwanda mu 2013 icyo gihe akaba yari yanayegukanye, yavuze ko kuri ubu asanga irushanwa ryarakomeye cyane by’umwihariko kuza kw’imodoka ya skoda yakorewe aya marushanwa gusa akaba abona ari indi ntambwe ndetse byari bigoye cyane guhangana nayo.

Uyu mugabo wahoze akina nk’Umunyarwanda ariko akaba yarahinduye agaruka nk’Umubiligi, yemeje ko iyi modoka igura akayabo ka miliyoni 160 z’amafaranga y’u Rwanda, ariyo yakoze ikinyuranyo hagati ye na Baryan Manvir nubwo atanashidikanya ko n’uyu musore ukiri muto afite ubuhanga muri uyu mukino.

Mu modoka 11 zari zasigaye mu irushanwa, umunani gusa ni zo zabashije kurirangiza zirimo iyo mu Rwanda imwe, iyo muri Kenya imwe, izo mu Burundi enye, iyo muri Uganda imwe no muri Zambia imwe.

Kubera kwiruka, imodoka zimwe zatambukaga abafana bakabona ivumbi gusa

Abafana mu bicu bishimira uburyohe bw’irushanwa

Abafana bari benshi ku mihanda

Abaterankunga b’iri rushanwa barimo Banki ya Kigali na Akarera Aviation nabo barashimiwe

Giancarlo Davite (u Bubiligi) & Slyvia Vindevogel (Burundi) begukanye umwanya wa kabiri

Manvier Baryan nÆumwunganizi we Sturrock Drew begukanye ôRwanda Mountain Gorilla Rally 2017

Manvier Baryan n’itsinda ry’abantu bari bamuherekeje bishimira intsinzi

LEAVE A REPLY

Please enter your comment!
Please enter your name here