U Bufaransa bwatangiye iperereza kuri banki ishinjwa uruhare muri Jenoside yakorewe Abatutsi

0
69
A picture taken on April 14, 2012 in Paris, shows the entrance of a BNP Paribas bank. AFP PHOTO LOIC VENANCE

Ubutabera bw’u Bufaransa bwasabye ishami ryabwo riri i Paris rishinzwe ibyaha bya Jenoside n’iby’intambara, gutangira iperereza ku birego bivuga ko banki ikomeye yo muri iki gihugu yitwa BNP Paribas yagize uruhare muri Jenoside yakorewe Abatutsi.

Mu mpera za Kamena uyu mwaka, nibwo Imiryango itatu yo mu Bufaransa irimo uwitwa Sherpa ugizwe n’abanyamategeko baharanira kurwanya ibyaha by’imari no kurengera ababikorewe; Impuzamiryango iharanira ko abakoze Jenoside mu Rwanda baburanishwa (CPCR) na Ibuka, bareze BNP Paribas, bayishinja kugira uruhare muri Jenoside yakorewe abatutsi.

AFP yatangaje ko kuri uyu wa Mbere aribwo ubutabera bwo mu Mujyi wa Paris bwemeje ko bwatangiye iperereza ku ‘kugira uruhare muri Jenoside n’ibyaha byibasiye inyokomuntu’ bishinjwa iyi banki; ndetse busaba ishami ryabwo rishinzwe ibyaha bya Jenoside n’iby’intambara ari naryo rikurikirana amadosiye 25 afitanye isano na Jenoside yakorewe Abatutsi; gukora iperereza kuri iyi banki.

Ikirego cyatanzwe n’iriya miryango itatu kivuga ko iyi banki yasohoye amafaranga bisabwe n’abari abayobozi mu Rwanda akishyurwa intwaro zazanwe mu gihugu muri Kamena 1994, bikanyuranya n’umwanzuro Umuryango w’Abibumbye wari wafashe ku wa 17 Gicurasi 1994, ukumira u Rwanda ku isoko ry’intwaro nyuma yo kubona ko hari kuba Jenoside.

Igurwa ry’izo ntwaro ngo ryari rihagarikiwe na Col Theoneste Bagosora wakatiwe gufungwa imyaka 35, ari kumwe na Petrus Willem Ehlers wari nk’umuhuza, uwo akaba yarabaye Umunyamabanga wa Pieter Willem Botha, Minisitiri w’Intebe wa nyuma wa Afurika y’Epfo.

Nk’uko ikirego cyashyikirijwe umucamanza mu rukiko i Paris kibigaragaza, ngo uwo muhuza yishyuwe inshuro ebyiri kuri konti iri muri banki yo mu Busuwisi (Union Bancaire privée de Genève), ubwa mbere ahabwa $592 784 indi nshuro ahabwa $734 099, yose hamwe akagera kuri miliyoni $1.3, yatanzwe na BNP Paribas bisabwe na Banki Nkuru y’u Rwanda, BNR.

Icyo kirego kigira kiti “BNP yemeje iyishyurwa rya M. Ehlers ryasabwe na BNR, ibintu izindi banki zose zari zanze gukora.” BNP ngo yabaye “banki rukumbi yasubije yemera kurekura ayo mafaranga ahagije Guverinoma y’u Rwanda igura intwaro.”

Icyo gihe ngo Guverinoma y’u Rwanda yari ikeneye amafaranga cyane, ariko nka Banque Bruxelles Lambert (BBL) yari yanze kuyarekura avuye kuri konti ya Banque commerciale du Rwanda (BCR).

Uwahoze ari umuyobozi muri iyo banki, Jacques Simal, ubwo yabazwaga na Polisi y’u Bubiligi ku wa 5 Gicurasi 2004, yagize ati “Nubwo impamvu itari yatangajwe neza, byagaragariraga buri wese ko bagombaga kugura intwaro n’ibisasu. […] Ndibuka ko kugira ngo babyumvishe BBL, Guverinoma y’u Rwanda yohereje intumwa ngo ize kutwumvisha kurekura amafaranga.”

Mu kirego cyatanzwe, ngo bigaragazwa neza ko BBL “yanze sheki yari yohererejwe, bituma Guverinoma y’u Rwanda idakoresha ayo mafaranga mu kugura intwaro.”

Marie-Laure Guislain uyobora Sherpa, umwe mu miryango yatanze ikirego, yagize ati “Ku buhamya na raporo dufite, BNP, ni urwego rw’imari rwonyine rwemeje ko iyo miliyoni $1, 3 akurwa kuri konti ya Banque Nkuru y’u Rwanda kandi hari hariho ibihano by’Umuryango w’Abibumbye, ajya kuri konti yo mu Busuwisi y’umunyafurika y’Epfo.”

“Mu makuru dufite ni uko BNP yari izi neza ko ayo mafaranga yoherejwe yari agiye kwifashishwa mu kugura intwaro no muri Jenoside.”

Ni ubwa mbere Banki yo mu Bufaransa igejejwe mu nkiko ishinjwa kugira uruhare muri Jenoside.

Iyi banki mu 2015 yabarirwaga umutongo wa Miliyari 1994 z’amayero ndetse mu 2015 inyungu yayo yageze kuri miliyari z’amayero 7.7

LEAVE A REPLY

Please enter your comment!
Please enter your name here